Guhera ku wa 10-12 Ukuboza 2024 Intumwa z’Urwego rw’Umuvunyi ziri mu Karere ka Nyanza mu Mirenge itandukanye mu rwego rwa gahunda yo gukumira no kurwanya akarengane na ruswa.

Ni gahunda yabereye mu mirenge yose igize Akarere ka Nyanza ariyo Busasamana, Ntyazo, Cyabakamyi,Busoro,Muyira,Mukingo,Kigoma,Kibirizi,Nyagisozi na Rwabicuma.

Hon.NIRERE Madeleine  Umuvunyi Mukuru aganiriza abaturage mu Murenge wa Busasamana mu Karere ka Nyanza

Muri iyi gahunda Intumwa z’Urwego rw’Umuvunyi bafatanije n’Ubuyobozi bw’Akarere ka Nyanza basobanurira abaturage inshingano z’Urwego rw’Umuvunyi na serivisi rutanga,bakabigisha gukumira no kurwanya akarengane na ruswa no kurangwa n’umuco w’ubunyangamugayo mu mikorere yabo ya buri munsi.

Hon.YANKULIJE Odette Umuvunyi Wungirije ushinzwe gukumira no kurwanya akarengane yakira ibibazo by'abaturage mu murenge wa Kigoma mu Karere ka Nyanza

Si ibyo gusa kuko muri iyi gahunda abaturage bahabwa n’umwanya uhagije wo kugeza ibibazo bitacyemuwe n’izindi Nzego ku Ntumwa z’Urwego rw’Umuvunyi,bimwe bigahita bicyemuka ibindi bigahabwa umurongo wo kubicyemura.

Ni gahunda abaturage ba Nyanza bitabiriye ku bwinshi ndetse n’abaturutse mu tundi Turere kuko ngo ibafasha kugeza ibibazo byabo ku Urwego rw’Umuvunyi bitabasabye kujya ku cyicaro i Kigali.

Hon.Abbas Mukama Umuvunyi Wungirije ushinzwe gukumira no kurwanya ruswa aganira n'abaturage mu murenge wa Muyira mu Karere ka Nyanza

Clarisse MUNEZERO Umunyamabanga Uhoraho w'Urwego rw'Umuvunyi aganira n'abaturage mu murenge wa Rwabicuma mu Karere ka Nyanza

Muri rusange muri iyi gahunda imaze iminsi 3, Urwego rw’Umuvunyi rwakiriye ibibazo 265 byose hamwe. Muri ibyo bibazo 115 byarakemutse ndetse ibindi bihabwa umurongo, umwanzuro wabyo ukazagezwa ku Urwego rw’Umuvunyi mu gihe kitarenze ukwezi.

Abaturage bitabiriye gahunda yo gukumira no kurwanya akarengane na ruswa mu Karere ka Nyanza ku bwinshi

Nyuma y’iyi gahunda Urwego rw’Umuvunyi rwaganiriye n’Ubuyobozi bw’Akarere ka Nyanza basaba  Ubuyobozi bw’aka Karere gushyira imbaraga mu kwigisha abaturage gusobanukirwa amategeko n’uburenganzira ariko no kubatoza umuco wo gukemura ibibazo by’amakimbirane batisunze inkiko kuko ibibazo byinshi byagaragaye muri iyi gahunda ari ibyagiye mu nkiko