Ku bufatanye na Minisiteri y’Ubutegetsi bw’Igihugu (MINALOC) Urwego rw’Umuvunyi ruri mu Karere ka Nyaruguru mu Mirenge igize aka Karere muri gahunda yo gukumira no kurwanya akarengane na ruswa guhera ku ya 10-13 Werurwe 2025

Ni gahunda itangirwamo ubutumwa busobanurira abaturage inshingano z’Inzego by’umwihariko iz’Urwego rw’Umuvunyi,uburenganzira bwabo,kudahishira akarengane na ruswa no kwakira ibibazo by’abaturage.

Bimwe mu bibazo byakiriwe muri iyi gahunda bihita bikemuka ibindi bigahabwa umurongo bigomba gukemurwamo ndetse raporo yabyo ikahezwa ku Urwego rw’Umuvunyi mu gihe giteganijwe.

Kimwe mu bibazo byakemukiye muri iyi gahunda yo gukumira no kurwanya akarengane na ruswa mu karere ka Nyaruguru ni ikibazo cy’umuturage wo mu murenge wa Ruheru wavugaga ko ahezwa ku mitungo yasigiwe n’umugabo we harimo n’inzu abana bakaba bashaka kuyimukuramo.

Ati :”Nashatse muri uyu muryango ,umugabo anshaka nyuma y’uko undi mugore wa mbere yaramaze kwitaba Imana,nyuma yaho nakomeje guhezwa ku mitungo irimo ubutaka abana nasanze umugore wa mbere yarasize bagashaka kwikubira ubutaka bwose,none ubu n’inzu mbamo bashaka kuyinsohoramo”

Nyuma yaho iki kibazo akigaragarije Abayobozi b’Urwego rw’Umuvunyi n’izindi Nzego zifatanije narwo muri iyi gahunda hanzuwe ko adakwiye guhezwa kuri iyo mitungo ndetse abana basobanurirwa ko iyi nzu bagomba kuyimurekeramo bakamuha ituze ibisigaye agahabwa 50% nk’umugabane we ku mutungo basangiye n’umugabo we abandi nabo bagasigarana 50% nk’umugabane wa se

Nyuma y’uyu mwanzuro impande zombi zashimye uko icyo kibazo gikemuwe bemeranya no kubishyira mu bikorwa ,abaturage bari mu nteko babikomera amashyi.

Muri rusange muri iyi gahunda imaze iminsi 4, Urwego rw’Umuvunyi rwakiriye ibibazo 173 byose hamwe. Muri ibyo bibazo 56 byarakemutse ndetse ibindi bihabwa umurongo, umwanzuro wabyo ukazagezwa ku Urwego rw’Umuvunyi mu gihe kitarenze ukwezi

Amafoto