Gahunda y’Ibikorwa by’Urwego rw’Umuvunyi y’umwaka wa 2025-2026 iteganya ko Urwego rw’Umuvunyi ruzasura Uturere dutandukanye muri Gahunda yo Gukumira no Kurwanya Akarengane aho Urwego rw’Umuvunyi rusobanurira amategeko abaturage ku burenganzira n’inshingano byabo mu gukumira no kurwanya akarengane na ruswa no ku mategeko akoreshwa mu bibazo baba bafite ndetse rugakemura ibibazo byabo ku bufatanye n’Ubuyobozi rubasanze aho batuye kuri site ziba zatoranyijwe.

Kuva ku itariki ya 24-28/11/2025 Urwego rw’Umuvunyi ku bufatanye na Minisiteri y’Ubutegetsi bw’Igihugu (MINALOC) rwasuye Akarere ka RUHANGO muri Gahunda yavuzwe haruguru, icyo gikorwa kikaba cyarakorewe mu Mirenge 9 igize Akarere ka RUHANGO

Abitabira iyi gahunda  bahabwa ubutumwa bukubiyemo gusobanurirwa inshingano z’Urwego rw’Umuvunyi mu gukumira no kurwanya akarengane na ruswa ,uruhare rw’abaturage,ibyiza byo gutanga amakuru kuri ruswa no gukemura ibibazo by’amakimbirane hatisunzwe Inkiko , nyuma y’ubwo butumwa hakakirwa ibibazo by’abaturage bitakemuwe n’izindi Nzego.

Atangiza iyi gahunda ,Umuvunyi Mukuru NIRERE Madeleine yasabye abayitabiriye kugaragaza uruhare rwabo rufatika mu gukumira no kurwanya akarengane na ruswa.

Ati: ”Mu by’ukuri iyo udahawe uhawe serivisi wemererwa n’amategeko bakagusaba gutanga ruswa ugaceceka ntuba ufashije Igihugu kuko ruswa imunga ubukungu bw’Igihugu ,ibyiza niba hari ukwatse ruswa duhe amakuru ibindi tubikurikirane. Kugirango turwanye akarengane ni uko tubanza tugasobanukirwa uburenganzira bwacu n’ubwo duhabwa n’amategeko. Ikindi niba ugiranye ikibazo na mugenzi wawe kuki wakwihutira guhita ujya mu rukiko? Uzajya mu manza zigutware igihe n’amafaranga,ariko igihe Ibibazo bikemuriwe mu bwumvikane birihuta kandi abantu bakaguma kubana neza”

Abitabiriye iyi gahunda ni gahunda bashima  kuko Abayobozi babasanga aho batuye bakabagezaho Ibibazo bigakemuka bitabasabye kujya i Kigali .

Umwe muri bo wo mu Murenge wa Ntongwe mu Karere ka Ruhango ati:”Bamwe twari dufite akarengane tutazi aho tubariza ,tukagera mu Nzego batubwira ngo dukomeze dutegereze,ariko ubu ndanezerewe cyane kuko banyemereye kugera aho ikibazo mfite cyabereye bitarenze ejo kugirango kirangire burundu kuko ni umuntu ushaka kuturiganya isambu yacu”

Undi muturage wo mu Kagari ka Nyarusange mu Murenge wa Byimana mu Karere ka Muhanga ati” Turashima Umuvunyi Kuba yatwegereye akaza kumva Ibibazo byacu, ino ni imiyoborere myiza niyo abaturage twifuza”

Muri rusange Urwego rw’Umuvunyi ku bufatanye na MINALOC n’Ubuyobozi bw’Akarere ka RUHANGO hakiriwe Ibibazo 137 byose hamwe. Muri ibyo bibazo 42 byahise bikemuka  ndetse ibindi bihabwa umurongo w’uko bizakemurwa,87 Ubuyobozi bw’Akarere bwasabwe kubikemura mu gihe kitarenze Ukwezi , naho ibindi 8 bizakomeza gukurikiranwa n’Urwego rw’Umuvunyi. Mu Mirenge myinshi y’Akarere ka RUHANGO Ibibazo byagaragaye muri iyi gahunds bishingiye ku izungura bigatera amakimbirane mu miryango ku byerekeye igabana ry’imitungo.