Muri gahunda y'ubufatanye bwa Leta, Abikorera, imiryango mpuzamahanga na sosiyete sivile, kuri uyu wa gatanu tariki ya 01.09.2023, Umuvunyi Mukuru Hon. Nirere Madeleine yakiriye abayobozi ba iPEACE mu Rwanda baganira ku mirimo ikorwa n'impande zombi mu kwigisha abanyarwanda uburenganzira n'inshingano bahabwa n'amategeko.

Umuvunyi Mukuru yashimiye ubuyobozi bwa iPEACE bwashyizeho uburyo bwo kwegereza abaturage serivisi z'ubufasha mu by'amategeko ku buntu [ Legal Aid Clinic & Mobile Legal Aid Clinic ] zaje zunganira iza MAJ ndetse na Anti-Injustice Campaigns z'Urwego rw'Umuvunyi ubusanzwe zigamije kwigisha abaturage amategeko no kubakemurira ibibazo.

Hon. MUKAMA Abbas, Umuvunyi wungirije ushinzwe gukumira no kurwanya ruswa

Hon. MUKAMA Abbas, Umuvunyi wungirije ushinzwe gukumira no kurwanya ruswa yashimye iPEACE ku musanzu wayo kuko iyo umuturage yamaze gusobanukirwa uko amategeko akora n'uko ashyirwa mu bikorwa bimufasha kutijandika mu byaha bya ruswa kuko aba azi ingaruka zabyo.

iPEACE yashimye uburyo Urwego rw'Umuvunyi rwateje imbere imyumvire y'abanyarwanda ku bijyanye n'amategeko, imiyoborere myiza, kurwanya ruswa, kurwanya akarengane byose bihurira hamwe gusigasira uburenganzira bwa muntu.

Hon.YANKULIJE Odette, Umuvunyi Wungirije ushinzwe gukumira no kurwanya akarengane

Mubyo yagarutseho, Umuvunyi Wungirije ushinzwe gukumira no kurwanya akarengane, Hon.YANKULIJE Odette, yasabye imiryango itandukanye irimo na sosiyete sivili kurushaho gukora ibikorwa bigamije kwigisha abaturarwanda amategeko kugira ngo barusheho kuyubahiriza kuko abereyeho buri wese no kubasobanurira ko leta y'u Rwanda ikomeje gukumira no kurwanya akarengane aho kagerageza guturuka hose.

Urwego rw'Umuvunyi rusanzwe rufitanye imikoranire n'inzego zinyuranye zirimo iza leta, izigenga, imiryango mpuzamahanga na sosiyete sivili mu rwego rwo gushyira mu bikorwa politiki y'u Rwanda yo gukumira no kurwanya ruswa n'akarengane.