Kuri uyu wa gatanu tariki 04 Gashyantare 2022, mu turere twa Huye, Gicumbi na Muhanga, Urwego rw’Umuvunyi rwahuguye komite zo kurwanya ruswa zikorera mu nzego zinyuranye za Leta.

Urwego rw'Umuvunyi rwabasobanuriye akamaro gakomeye izi komite zifite mu buzima bw'Igihugu

Muri utu turere uko ari dutatu ku ikubitiro hahuguwe abagera ku 159, babwirwa ko bakwiye gukaza ingamba zo kurwanya ruswa mu nzego bakoramo.

Bibukijwe ko izi komite zashyizweho mu rwego rwo kugira ngo hazibwe ibyuho bya ruswa mu bigo binyuranye, aya mahugurwa akaba agamije kongera ubumenyi abagize izi komite kugira babashe kushyira mu bikorwa politiki yo kurwanya ruswa babifitiye ubumenyi buhagije.

Komite ishinzwe kurwanya ruswa muri buri rwego/ikigo, ifite inshingano zikurikira:

• gufasha gushyiraho ingamba zihariye zo gukumira no kurwanya ruswa;
•  gukora isesengura ry'imikorere y'urwo Rwego/Ikigo hagamijwe kumenya niba nta byuho bya ruswa bihari;
• gushyira mu nyandiko ibyuho byagaragaye;
• gushyiraho imirongo ngenderwaho mu kuziba ibyuho bya ruswa;
• gutegura ibikorwa by’ubukangurambaga bugamije gukumira no kurwanya ruswa muri urwo Rwego/Ikigo;
• gukurikirana no gutanga amakuru ku bikorwa byo kurwanya ruswa;
• gukurikiranira hafi serivisi zikekwamo kugira ibyuho bya ruswa;
• gutanga inama ku gushimangira ingamba zo gukumira no kurwanya ruswa mu mikorere y’izo Nzego/Ibigo.

Abahuguwe banejejwe n'uko Urwego rw'Umuvunyi rwabahuguye

Abahuguwe kandi bibukijwe ko nyuma y’aya mahugurwa bagiye gushyira mu bikorwa ibyo bahuguweho ndetse bakazajya batanga raporo.