Kuri uyu wa gatanu tariki ya 11 Gashyantare 2022, Urwego rw’Umuvunyi rwasoje ibikorwa by’ubukangurambaga bwo gukumira no kurwanya akarengane mu turere twa Nyanza, Huye, Gakenke, Rutsiro na Rulindo.

Aha ni mu karere ka Rulindo Umuvunyi Mukuru yakira ikibazo cy'Umuturage uvuga ko yarenganye cyane

Ni ubukangurambaga bwatangiye kuwa mbere tariki 07 Gashyantare 2022 busozwa kuwa gatanu tariki 11 Gashyantare 2022 muri utu turere bukaba bugamije gukumira no kurwanya akarengane hatangwa ubutumwa bwo kurwanya akarengane na ruswa kuko itera akarengane.

Uretse gutanga ubutumwa binyuze mu bitangazamakuru binyuranye, Urwego rw’Umuvunyi rwakiriye kandi runakemura ibibazo by’abaturage byari byarananiranye mu zindi nzego maze ku bufatanye n’Ubuyobozi bwa buri karere ibibazo bitahise bikemurwa bihabwa umurongo uhamye bigomba gukemurwamo.

Hakirwaga abaturage bake bake bahana intera hubahirizwa amabwiriza yo kwirinda Covid-19

Muri rusange ibibazo Umuvunyi Mukuru, Abavunyi bungirije ndetse n’Abakozi b’Urwego rw’Umuvunyi bakiriye hirya no hino mu mirenge igize utu turere byiganjemo iby’amakimbirane ashingiye ku butaka, ingurane ndetse n’ibyemezo by’abunzi n’abacamanza bidashyirwa mu bikorwa.

Itsinda ryari kumwe n’Umuvunyi Mukuru Hon. NIRERE Madeleine muri ubu bukangurambaga ryakiriye ibibazo 81, muri byo 29 byahise bikemuka, 51 byahawe umurongo bisigirwa Akarere kugira ngo kazabikemure gatange raporo mu gihe cy’amezi abiri naho ikibazo 1 kikazakurikiranwa n’Urwego rw’Umuvunyi.

Mu karere ka Gakenke, Umuvunyi wungirije Hon. YANKULIJE Odette hamwe n’itsinda yari ayoboye muri ubu bukangurambaga bakiriye ibibazo by’Abaturage 73 muri byo 35 bihita bikemuka, 34 bisigirwa akarere ngo kazabikemure gatange raporo y’uburyo byakemutse ku Rwego rw’Umuvunyi mu gihe cy’amezi abiri naho ibibazo 4 bikazakurikiranwa n’Urwego rw’Umuvunyi.

Itsinda ryari riyobowe n’Umuvunyi Wungirije Hon. MUKAMA Abbas mu karere ka Nyanza ryakiriye ibibazo 69 aho muri ibyo 29 byakemutse, 38 bikazakomeza gukurikiranwa n’Akarere ka Nyanza naho 2 bikazakurikiranwa n’Urwego rw’Umuvunyi.

Mu karere ka Rutsiro, Umunyamabanga Uhoraho w’Urwego rw’Umuvunyi Bwana MBARUBUKEYE Xavier hamwe n’itsinda bari kumwe bakiriye ibibazo by’abaturage 43, hakemuka 14, hanyuma 24 bisigirwa akarere, Urwego rw’Umuvunyi rukazakomeza gukurikirana ibibazo 4 naho ikibazo 1 kikaba kizohererezwa akarere ka Rubavu.

Abayobozi muri utu turere ndetse n’abaturage bavuze ko bishimiye iki gikorwa cy’Urwego rw’Umuvunyi kuko bifasha impande zombi kumanuka bakareba ibibazo abaturage bafite bakabikemura kuko usanga bimwe muri byo biba byaratewe no kurangaranwa.

Abaturage bishimiye ko bahawe umwanya uhagije bagasobanura ibibazo byabo

Abayobozi b’Urwego rw’Umuvunyi bashishikarije abaturage kugana inzego zikabafasha ku bibazo bagira kuko ari cyo inzego zashyiriweho mu rwego rwo kwirinda gutindana ibibazo byabo kuko gutinda bishobora gutuma barengana. Abayobozi mu nzego z’ibanze kandi basabwe kurushaho kwita ku baturage bayobora mu buryo bwose bushoboka cyane cyane babarinda kuba barengana kuko umuturage agomba guhora ku isonga.

Abayobozi bagiriwe inama yo kujya bakemura ibibazo by'abaturage hakiri kare kuko ubutabera butinze bubyara akarengane

Ubu bukangurambaga buzakomereza mu tundi turere abaturage bakomeze kwigishwa kurwanya ruswa n’Akarengane.

Abaturage batangaje ko bishimiye uburyo Urwego rw'Umuvunyi rukemuramo ibibazo byabo mu gihe ahandi byanze