Kuri uyu wa mbere tariki ya 25 Werurwe 2024, Urwego rw'Umuvunyi rwamurikiye ubuyobozi bw'Umujyi wa kigali ibibazo n'ibyifuzonama byakusanyijwe muri gahunda yo gukumira no kurwanya akarengane mu turere tugize umujyi wa Kigali  ari tyo Gasabo, Kicukiro na Nyarugenge guhera tariki ya 26 Gashyantare kugeza tariki ya 21 Werurwe 2024.

Umuyobozi w'Umujyi wa Kigali wungirije ushinzwe Ubukungu n'Imibereho y'Abaturage Madamu URUJENI Martine ( iburyo) Umuvunyi Mukuru Madamu NIRERE Madeleine ( Hagati) Umuvunyi Wungirije Ushinzwe gukumira no kurwanya Akarengane Madamu YANKULIJE Odette (Ibumoso)

Ubusanzwe muri buri karere iyo Urwego rw'Umuvunyi rwakoze gahunda y'ubukangurambaga nk'ubu, ku munsi wo gusoza abayobozi barahura bakarebera hamwe uko ubukangurambaga bwagenze ndetse n'ibibazo binini bikeneye ubuvugizi ndetse n'ibyo buri karere kaba kagomba gushyira imbaraga mu gukemura.

Inzego zinyuranye zaganiriye kuri iyi raporo

Umwihariko w'Umujyi wa Kigali ni uko habanje gusurwa uturere twose uko ari dutatu hanyuma inama ihuza abayobozi ikabera rimwe hagamijwe kubonera rimwe ishusho rusange y'ibibazo byose biri mu batuye umujyi wa Kigali.

Ibyinshi mu bibazo byagaragaye muri raporo Urwego rw'Umuvunyi rwahaye umujyi wa kigali ni ibijyanye n'amakimbirane mu miryango, amakimbirane y'ubutaka cyane cyane ku ihererekanyabubasha ndetse no kuba abenshi badakorera ubugure bw'ubutaka imbere ya Noteri ubishinzwe.

Umuyobozi w'Umujyi wa Kigali wungirije ushinzwe Ubukungu n'Imibereho y'Abaturage Madamu URUJENI Martine yashimiye Urwego rw'Umuvunyi kuri iyi raporo, avuga ko Umujyi uzayifashisha kugira ngo ibibazo bitakemutse bihabwe umurongo  no gusuzuma niba nta bibazo birimo byaba byarahawe umurongo bikongera kubazwa.

Umuvunyi Mukuru, Madamu NIRERE Madeleine

Umuvunyi wungirije ushinzwe Gukumira no kurwanya Akarengane, madamu YANKULIJE Odette

Ubuyobozi bw'Umujyi wa Kigali kandi bwashimiye Urwego rw'Umuvunyi  kuri gahunda yo gukumira no kurwanya akarengane kuko ari gahunda nziza ituma ubuyobozi burushaho kumenya uko abaturage bahabwa serivisi ndetse no kubakemurira ibibazo bafite.