Foto: Umuvunyi wungirije Hon. Yankulije Odette ari kumwe n'intumwa z'akarere ka Nyanza mu gukemura ikibazo cya BAJENEZA Lambert

Muri gahunda yo gukurikirana ikemurwa ry’ibibazo Abaturage baba baragejeje ku Urwego rw’Umuvunyi bigahabwa uturere ngo tubikemure, kuva tariki ya 13 kugeza kuya 17 Nzeli 2021 Urwego rw’Umuvunyi rwatangiye igikorwa cyo gukurikirana ibibazo byarakiriwe mu mwaka w’ingengo y’imari wa 2020-2021 biri mu turere bitarakemurwa

Muri Ibi bibazo harimo ibyagejejwe ku Urwego rw’Umuvunyi binyuze mu nyandiko harimo n’ibyakiriwe mu gihe cy’Ubukangurambaga bwo gukumira no kurwanya Akarengane hirya no hino mu gihugu.

Mu Ntara y’Amajyepfo Umuvunyi wungirije ushinzwe gukumira no kurwanya akarengane madame Yankulije Odette hamwe n’itsinda ry’abandi bakozi bakurikiranye ibibazo bitari byakemuka mu turere twa Nyanza, Huye, Gisagara na Nyaruguru.

Byinshi muri ibi bibazo byari byarahawe uturere ngo tubikemure kuko twari tubifitiye ubushobozi, hari ibyamaze gukemuka, ibyari mu nzira yo gukemuka ndetse n’ibitarakemutse ariko byahise bihabwa umurongo n’igihe ntarengwa byaba bimaze gukemuka mu rwego rwo kurinda umuturage kurengana kandi yaragejeje ikibazo cye ku nzego bireba.