Foto: Hon. MUKAMA Abbas ari kumwe na Mayor mu gukemura ikibazo cy'Umuturage witwa GATO Félix mu karere ka Kayonza

Muri gahunda y’ikurikirana ry’ibibazo biba byaragejejwe ku Urwego rw’Umuvunyi bikohererezwa uturere ngo tubikemure ariko bigatinda gukemurwa, kuva tariki ya 13 kugeza tariki ya 17 Nzeli 2021, Umuvunyi wungirije Hon. MUKAMA Abbas ari kumwe n’itsinda ry’abakozi b’Urwego rw’Umuvunyi basuye intara y’Uburasirazuba muri gahunda yo gukurikirana ibibazo by’abaturage bo muri iyi ntara byakiriwe mu mwaka w’ingengo y’imari wa 2020-2021.

Ibi bibazo birimo ibyakiriwe mu gihe hakorwaga ubukangurambaga bwo gukumira no kurwanya akarengane ndetse n’ibyo urwego rw’Umuvunyi rwagejejweho n’abaturage mu nzira zisanzwe.

Uturere twahereweho ni Rwamagana, Kayonza na Nyagatare hakaba hakunze kurangwa ibibazo ahanini birebana n’amakimbirane ku ubutaka.

Muri ibi bibazo byakemuwe ku bufatanye n’abakozi b’uturere harimo ibyahise bikemurwa  ibindi bihabwa umurongo uzatuma haboneka ibisubizo birambye..

Iyi gahunda yakozwe ku bufatanye n’Umuryango w’Ibihugu by’Ubumwe bw’Uburayi ni gahunda yo kwegera abaturage mu rwego rwo kubakemurira ibibazo baba bagejeje ku nzego bireba.