Inteko Inshinga amategeko yashimye Raporo y’Ibikorwa by’Urwego rw’Umuvunyi mu mwaka wa 2021-2022
Kuri uyu Wagatatu tariki 26 Ukwakira 2022, Umuvunyi Mukuru Madamu Nirere Madeleine, yagejeje Raporo y’Ibikorwa(2021-2022) na Gahunda y’ibikorwa (2022-2023) by’Urwego rw’Umuvunyi ku Inteko ishinga amategeko imitwe yombi.
Umuvunyi Mukuru yagiye agaruka ku bikubiye muri raporo Urwego rw’Umuvunyi rwabonye birimo bimwe mu bibazo by’ingenzi rwasanze abaturage bahura nabyo.
Urwego rw'Umuvunyi rugeza raporo na gahunda y'ibkorwa ku nteko
Ibibazo by'ubutaka n’imanza zibukomokaho,Abaturage bangirijwe imitungo ntibahabwe amafaranga y’ingurane, Ba Rwiyemezamirimo bamwe bakoresha abaturage bakagenda batishyuye; Imikorere y’Abunzi bamwe itanoze kuko bafata ibyemezo ku bintu bitari mu bubasha bwabo, Imanza nyinshi mu Nkiko usanga umuntu atanga ikirego agahabwa gahunda y’iburanisha mu gihe kirenze amezi atandatu; Imanza zifite agaciro gato zirangizwa n’abahesha b’Inkiko b’Umwuga (Professional Bailiff) kandi agaciro kazo kari munsi y’igihembo cyabo bigatuma kwishyuza umuturage binyuze mu cyamunara bimusiga mu bukene n’ibindi.
Abadepite basubijwe ku bibazo bibazaga kuri raporo
Nyuma yo kugezwaho iyi raporo, abadepite n’abasenateri batanze ibitekerezo n’ibibazo bitandukanye ndetse bimwe bibonerwa ibisubizo ibindi bitangwa nk’inama uru rwego rugomba gushyira mu bikorwa.
Umuvunyi Mukuru yagaragarije inteko ishinga amategeko ko inama bahawe bazazikurikiza mu kurushaho kunoza imikorere mu kurwanya ruswa n’akarengane mu nzego zose.
Inteko Ishinga amategeko yashimye Raporo iyohereza muri Komisiyo zigize imitwe yombi zikazayisesengura zikazayigeza ku Nteko Inshinga amategeko buri mutwe wateranye.