Urwego rw’Umuvunyi rwishimiye kwakira itsinda ry’abayobozi baturutse muri Komisiyo Ishinzwe Kurwanya Ruswa mu gihugu cya Sudan y’Epfo. Iri tsinda rije kwigira k’u Rwanda uko rushyira mu bikorwa ingamba zo kurwanya ruswa n’akarengane ndetse n’uburyo bwo kumenyekanisha imitungo ku bakozi ba leta hifashishijwe ikoranabuhanga n’ubufatanye bw’izindi nzego.

Iri tsinda ryakiriwe na Hon. YANKURIJE Odette Umuvunyi wungirije ushinzwe kurwanya akarengane ,Hon.Abbas MUKAMA Umuvunyi wungirije Ushinzwe Gukumira no Kurwanya Ruswa, hamwe n’abandi bayobozi b’Urwego rw’Umuvunyi barimo n’Umunyamabango uhoraho Bwana MBARUBUKEYE Xavier.

Iri tsinda ryahawe ibiganiro bitandukanye bijyanye no kurwanya ruswa n’akarengane ndetse n’uburyo bwo kumenyekanisha imitungo ku bakozi ba leta ,bakira ibibazo n’ibitekerezo biturutse muri iri tsinda rya Komisiyo Ishinzwe Kurwanya Ruswa mu gihugu cya Sudan y’Epfo.

Ibiganiro iri tsinda ryahabwaga byatambukaga imbere yabo bigaragara mu nyandiko

Hon. Samuel Jok bany mading Umuyobozi Mukuru wa Komisiyo Ishinzwe Kurwanya Ruswa mu gihugu cya Sudan y’Epfo ari nawe wari uyoboye iri tsinda yerekanye imikorere iyi komisiyo ifite muri icyo gihugu avuga ko ashima imikorere y’Urwego rw’Umuvunyi mu Rwanda kandi avuga ko hari byinshi babigiyeho nabo bashobora gushyira mu  bikorwa mu buryo bumwe cg ubundi.

Hon. Samuel Jok bany mading Umuyobozi Mukuru wa Komisiyo Ishinzwe Kurwanya Ruswa mu gihugu cya Sudan y’Epfo.

Hon. Yankurije yashimye iri tsinda kuba ryaratekereje kuza mu Rwanda kwigira kubyo rukora ariko kandi akavuga ko n’Urwego rw’Umuvunyi rufite ibyo rwigiye ku mikorere y’iyi komisiyo akavuga ko ibi bigamije kwagura imikoranire n’ubufatanye nk’abakora mu nzego ziri mu muryango w’Afurika y’Iburasirazuba. Yasoje abwira iri tsinda ryaturutse muri Sudan y’Epfo ko biyumvamo ikaze mu Rwanda ari amahoro bashobora no kurutembera amanywa n’ijoro.

Hon.YANKURIJE Odette Umuvunyi Wungirije Ushinzwe Kurwanya Akarengane.

Hon.Abbas MUKAMA Umuvunyi Wungirije Ushinzwe Kurwanya Ruswa.

Bwana MBARUBUKEYE Xavier Umunyamabanga Uhoraho w'Urwego rw'Umuvunyi