Muri gahunda yo Kwibuka ku nshuro ya 29 Jenoside yakorewe Abatutsi muri Mata 1994, kuri uyu wa Gatatu, Abakozi n’Abayobozi b’Urwego rw’Umuvunyi bahawe ikiganiro ku mateka ya Jenoside yakorewe Abatutsi muri 1994. Me Bayingana Janvier waturutse mu Muryango uharanira inyungu z'Abacitse ku icumu rya Jenoside yakorewe Abatutsi muri mata 1994, IBUKA yatanze Ikiganiro  ku nsanganyamatsiko igira iti: "Twibuke Twiyubaka Tudaheranwa n'Amateka Mabi".

Muri iki kiganiro hagarutsweho ko Jenoside yakorewe Abatutsi ifite imizi mu ngengabitekerezo y’urwango yabibwe mu Banyarwanda igihe kinini. Hagaragajwe kandi ko uyu munsi hakiri abagifite iyo ngengabitekerezo n’abakomeje kuyibiba hirya no hino. Hanagarutswe ku isenywa ry’ubumwe bw’abanyarwanda uhereye igihe cy’abakoloni, repubulika zakurikiye abo bakoloni; iya mbere n’iya kabiri.

Umuvunyi Mukuru Nirere Madeleine yihanganishije Abanyarwanda bose by'umwihariko abakozi b’Urwego rw’Umuvunyi muri ibi bihe byo Kwibuka ku nshuro ya 29 Jenoside yakorewe Abatutsi muri Mata 1994.

Umuvunyi Mukuru kandi yasabye urubyiruko kudaha agaciro ibihuha bikwirakwizwa ku mbuga nkoranyambaga bishaka kubangisha Igihugu (Rwanda).

Umuvunyi Mukuru yasabye abakozi b'Urwego rw'Umuvunyi gukomeza Kwibuka Twiyubaka. Yanashimiye kandi Ingabo zari iza FPR-Inkotanyi (RPA) zahagaritse Jenoside yakorewe Abatutsi ashimangira ko Jenoside yashobotse icyo gihe kubera akarengane kari karimitswe mu gihugu.

Abatanze Ibitekerezo bose bashimye ikiganiro cyatanzwe bakomeza kandi gushima Ingabo za FPR zahagaritse Jenoside zari ziyobowe na Nyakubahwa Kagame Paul, Perezida wa Repubulika y’u Rwanda. Ibikorwa byo Kwibuka29 ku Rwego rw’Umuvunyi bizakomeza muri iyi minsi 100 yo Kwibuka aho tariki 5/05/2023, Abakozi n’Abayobozi b’Urwego rw’Umuvunyi bazasura Urwibutso rwa Jenoside rwiswe COUR D’APPEL DE MUSANZE mu rwego rwo kunamira inzirakarengane zihashyinguye.