Kuva tariki 27-30/03/2023, Urwego rw’Umuvunyi rwakoze icyumweru cyahariwe ubunyangamugayo cyabereye mu Ntara y’Iburengerazuba. Insanganyamatsiko y’iki Cyumweru ni " Guteza imbere ubunyangamugayo: Umuntu ku giti cye, aho akorera no mu muryango hagamijwe gukumira no kurwanya akarengane na ruswa”.

Bimwe mu bikorwa byaranze iki cyumweru ni ibiganiro kuri Radiyo Isangano mu Karere ka Karongi, Radiyo Rubavu (RC Rubavu) mu Karere ka Rubavu, Ibiganiro n’abanyeshuri bo muri Kaminuza ya ULK Gisenyi nka bamwe mu bayobozi b’ejo hazaza ndetse n’Ibiganiro n’Abayobozi bo mu Ntara y’Iburengerazuba.

Hasozwa iki Cyumweru tariki ya 30/03/2023, iki cyumweru cyitabiriwe n’Umuvunyi Mukuru Madamu Nirere Madeleine, Guverineri w'Intara y'Iburengerazuba HABITEGEKO Francois, n'Abayobozi b'Uturere two mu Ntara y'Iburengerazuba n'abandi baturutse mu Nzego zitandukanye bitabiriye Inama Nyunguranabitekerezo isoza icyumweru cyahariwe guteza imbere Ubunyangamugayo. Iyi nama yabereye mu karere ka Rubavu.

Mu Ijambo ry'ikaze, Guverineri w'Intara y'Iburengerazuba HABITEGEKO Francois yashimye Urwego rw'Umuvunyi kuri ubu bukangurambaga bwo guteza imbere ubunyangamugayo, yibukije kandi abitabiriye inama ko Umuyobozi ufite indangagaciro z'Ubunyangamugayo aca ukubiri n'akarengane na ruswa.

Atangiza iyi nama, Umuvunyi Mukuru NirereMadeleine yavuze ko ubunyangamugayo n’ukuri aribyo byagombye kuranga umuntu wese, cyane Umuyobozi mwiza, bikamubera umukenyero, akitera n’izindi ndangagaciro zibiherekeza.

Yagaragaje ko Umuyobozi mwiza agomba kuba ikitegererezo mu byo akora,gukunda abo ayobora, gukunda umurimo, kwiyubaha, kwihangana, kugira umuco wo kwihugura,kuhindura imyumvire y'abo ayobora, kumenya kubaho uwo uriwe, kugira imyitwarire mizima itarimo uburiganya n'izindi.

Yagize ati “Muri make, Umuyobozi mwiza agomba kuba umunyakuri (Honest), umuhanga (Professional), kuzana impinduka nziza (keeping his/her mind open) no gukunda Igihugu (patriot). Agomba kandi gutanga umurongo abantu bagenderaho (Leadership), gufasha abandi gukorera hamwe (Team work), no kugera ku ntego (Efficiency).”

Umuvunyi Mukuru yasobanuye ko Itegeko Ngenga N° 11/2013/0L ryo kuwa 11/09/2013 rihindura kandi ryuzuza Itegeko Ngenga nº 61/2008 ryo kuwa 10/09/2008 rigena imyitwarire y’Abayobozi mu nzego za Leta rizafasha kumenya imyitwarire umuyobozi asabwa kugira rikamwereka n’ibyo abujijwe gukora bitabangikana n’umwanya w’ubuyobozi.