Kuva ku itariki 2 Gashyantare 2022, Urwego rw’Umuvunyi rwatangiye guhugura ibyiciro binyuranye by’Abanyarwanda ku bubi bwa ruswa n’Akarengane ndetse n’imyitwarire y’abayobozi.

Iyi gahunda yatangiranye no guhugura abagize komite z’abunzi mu turere twa Huye, Muhanga na Gicumbi ahahuguwe abunzi 150 bari bahagarariye abandi baturutse mu mirenge itandukanye igize utu turere.

Abahuguwe baturutse mu mirenge inyuranye y'Uturere twa Huye, Muhanga na Gicumbi

Nk’uko kwigisha abaturarwanda indangagaciro zo kurwanya ruswa n’akarengane biri mu nshingano z’Urwego rw’Umuvunyi aya mahugurwa yahawe abunzi kubera ko aria bantu bunganira ishyirwa mu bikorwa ry’ubutabera mu Rwanda kandi ibyemezo bafata bikaba bihinduka itegeko mu gihe bitajuririwe ku rukiko rw’ibanze. Ibi bituma rero Abagize komite y’abunzi iyo batabaye inyangamugayo bashobora kurya ruswa ndetse bagateza akarengane gakomeye ku muturage.

Abunzi bibukijwe ko uhamwe n'icyaha cya ruswa ahanishwa igihano kiri hejuru

Abahuguwe bagaragaje ko bishimiye guhabwa aya mahugurwa n’Urwego rw’Umuvunyi ndetse banagaragaza ahari ibyuho bya ruswa mu kazi kabo ka buri munsi. Urwego rw’Umuvunyi rwaboneyeho gusaba abagize komite z’Abunzi kumenya ko kuba badahembwa idakwiye kuba intandaro yo kwishora muri ruswa ahubwo ku bakwiye gukora bakiteza imbere kuko akazi ko kunga batagakora buri munsi kandi ko ubwangamugayo ari bwo buzabafasha muri byose.

Abunzi basabwe kugira imyitwarire irimo indangagaciro z'ubwangamugayo

Abunzi bishimiye aya mahugurwa basaba ko bakomeza kuyahabwa mu bihe binyuranye